چندتا می قدیمی چاردانه

نخوام ده بيشتاوم حرفه حيسابــه
آ دورانه ميان نوكيسه دابـــــــــه
خايم جنگل بشم جنـــگل ببم دور
كئ هركه فاندرم رحمت به گابه

...

بينيشته آسمان مئ شــــانه سر باز
بوگوده هانده مئ غمخــانا در واز
هاتو اشــــــــــــكانه امرا دانه دانه
مئ قورصاايشمارم ناله كونه ساز

....

مئ دستا موشتاگودفورشابزم موشت
بوگفتم كئ مــرا دورئ ده بو دوشت
ايوار دريــــا بيدم باكخ بوگود جوش
مراهيستا گــــوده پاك مرا بوشوست

....

مئ داره سر خيـالام داره پايه
چومانه اشكه امرا پـــــا برايه
دپركه ديل خيــالا دس بدامان
شبانده روز زنه مئ جانا پايه

..

زمستـــانه شبان سرمايوسختئ
سرا شه عاقبت لاتـــــانه لختئ
جه راه آخه رسه سبزه بهاران

آمئ جنگل پورابه سبزه داران

.

دوتا می قدیمی غزلان: وفادارئ آ زمانه بمرد

وفادارئ آ زمانه بمرد


وفا نوگو کئ وفادارئ آ زمانه بمرد
نئ یافئ عشقو وفا یاره بئ بهانه بمرد
هاچین گولازا درئ روزیگاره دربدرئ
دیلی کی پر نکشه بوک بوکوده لانه بمرد
دیلا فوتورک ناوره نامه یارو دیلدارا
کئ مهربانئ وفا با خوسرعلامه بمرد
تو ساده دیل هاچینه دیلخوشی کی یارئ نا
دیلا هاچین دبازی، یاره تئ ترانه بمرد
دیلئ تو تام بزن هرماله کس وفا نوکونه
ناویره دق نوگودئ نازه تئ شبانه دمرد
واچین تو هرچئ بیگیفتئ خیاله امرا سر
نگاره پور جه همه ادعا چئ ساده دمرد
نایه ده هیشکئ ببه صافه ساده دیلا یار
کئ یارئ حرفه، وفاداره عاشقانه بمرد
گیل آوایئ نوا اورشین گودن تئ تنهایه

در آ زمانه کرا عشقه صادقانه بمرد

.

گورشه کا بوستن نیبه


عشقه بئ فردا مرا جز گورشه کا بوستن نیبه
روز و شب مستانه هائ ویرانه جا کفتن نیبه
هائ فغان و ناله یو سینه درانئ ایجگره
بئ وفا یاره واسختن چوم برا بوستن نیبه
ده وفاداره واسئ وا دان کرا بون پیله لات
تسکو تنها نیشتن و هائ یاره جا گفتن نیبه
عشقو یارو یاوره آبچا گوده آ روزیگار
توف به آ زخمه زمانه از وفا گفتن نیبه
ناز بداشته کئ نیبه روزانه سختئ پا بپا
یار نده یارئ جهندم بئ صدا بوستن نیبه
ساده دیل باور بوگود یارا فادا دارو ندار
زخمه کارئ امرا آخه دسکلا بوستن نیبه
دیل ده وسته گریه زارئ اشکو آهوناله داد
تا آکه راه فاندرستن سر بچا بوستن نیبه
نام آویره آ زمانه هرکئ خو موشتا واگود
رازه دیل گفتن جه روسوایئ خفا بوستن نیبه
بئ وفایا دیل دوستئ وا بوسوجئ بئ گونا

ول نیگیره دیل گیل آوایئ مرا بوستن نیبه

.

ایتا چاردانه

می دیل تی امرا، تی دیل کی مرایه
می را تی خانه را، تی را کو رایه
نیبی هر ماله تو می دیله همرا
چره بیخود زنی می دیله پایه

توکی می امرا هرماله نایی را
گیری بیخود می دیله تره پایه

ایتا چاردانه

زمانه پاک بوبوسته لالیکی دار
کرا هرکه دینی بوستان دره قار
دمردم تاســــــــــــیانی داده بیداد
چره واستی اویرا به می دیل دار

دو واره واستی سبزا بُون، بهارا بُون، گیل آوایی

دو واره واستی سبزا بُون، بهارا بُون

هاچین غورصه واره غورصه
جه غورصه دیل پورا بوسته
امی خاکا کرا ناکس
دوارسته دوارسته
امی دارو ندارا پاک فه وه رسته
دباختیم خیلی وخته
دادو بیداد
ده امی ره چی بمانسته
جغیر از تو مره یو
من تره،
اخاکه مئن هیچی نمانسته
نمانسته نمانسته

دو واره
واستی میدان شون
دو واره
جنگلی وا بون
دو واره
ناکسانا وا فوتورکان بون

دو واره
واستی سبزا بون
بهاران بون
دو واره
میهنا واستی جه خون شوستن
جیوانا بون
بهارا بون

دختر شالیزار، با صدای استاد پوررضا

دوتا گیلکی چاردانه

ایروز آیه تَرِم نایه، تونام شی

نیهینه هیشکی تی کاخا به یک شی

تونام بی لاب ایموشته خاکه در باد

دمخته واشا بی مردومه راشی

...

نوبُو اروزیگار هیشکه وفادار

ترا گیفتن نوا بیخود نوکون قار

تی اخمانا واکون یاور بوبو یار

ایروز دینی نی یه هیشکی تیغمخوار

ایتا چاردانه - گیل آوایی

تو کی می امرا دایم پا به پا بی

آویرابوسته جا مئن جاجیگا بی

هاتوکی ایجگیره بوستی می فریاد

مرا تو بال زئی می هم صدا بی

نامو می ویرجا، می ویرجا غریبه زاره هاچین

نامو می ویرجا، می ویرجا غریبه زاره هاچین

جه تاسیانی یو بی کس فوقوفته زاره هاچین

نامو! نامو! نوا دئن! خاکه غوربتا ننه پا

نبه تی قسمت اغوربت کی شونده زاره هاچین

نانی چوتو فوخوسه هرجه کون جیویشته حریف

کی کویا کا کونه غوربت، جیگیفته زاره هاچین

مرا نوگو چی خوشا دور یو خوشا غوربت

دمردا بی! آویرا بی! بکفته زاره هاچین

نانم کی داب بوگوده دورابون جه خاکه وطن

خراب ببه! واسوجه! دورا بوسته زاره هاچین

نوگو می امرا کی من خوشخوشانه دیل شادم

جه هر دوجا بمانستم زمانه زاره هاچین

نامو می ویرجا، نوا دئن چوتو مره قاقم

کی می پیاله جه ارسو، ترانه زاره هاچین

گیل آوایی شبو روز با پیاله به پیله لات

ناویره جوم بوخوره! زندگانی زاره هاچین

اغزل آوریله 2004 با ردیفه "ریفق " بوگفته بوم کی ایتا پیچه چاکون واکون بوکودم و تاسیانه مئن بنام

دوتا تازه چاردانه گیل آوایی

نیدین کی سربیجیرو سر برایم
تی واستی یه ناویره بی حیــایم
هاچین لاتم کی هرماله نبم رام
مثــاله راشمه* ســـر به هوایم
*راش = ایتا درخته ایسمه

....

اگر چی تورا بوم، تی ســــر برایم
تی واستی پر کشم تی رایــــــا پایم
هاچین واهیلا بو ایســــــام تی رافا
تی جانکی بی تو من هیچی نخوایم

کاره دونیایه خوره بشکسته پا همیشه سنگ

کاره دونیایه خوره بشکسته پا همیشه سنگ
گیل آوایی
کی بنا رسمه جودایی بی تو تنها هیچه مه
تی خیالا سر گیرم آتش گیرم واویجه مه
پر گیرم باله خیاله امرا شم تی جا جیگا
های ایسم چوم اینتظاری پاک مرا واپیچمه
درده درده درده بی تو بی کسی تنها ایسان
پاک مثاله خوشکه هیمه پاک مرا وارجینه مه
گر چی من باور نداشتیم دیل کرا بازم ترا
دیل دباختم دیل دباختم بی وفا لاب گیجه مه
کاره دونیایه خوره بشکسته پا همیشه سنگ
من کی سرتا پا وفایم بی وفا جا بیجه مه
آی کی تو آتش بزی می دیلو جانا با تی کار
به بیدین سوجم واسوجم ول گیرم دیبیجه مه
گیل آوایی توبوسوج واسوج بوکون تیسینا چاک
بی وفا یارا هاچین گفتان دری واویجه مه

تو چره

تو چره
گیل آوایی

واپیچی بیخودی های می پله پایا تو چره
کرا لیسکا بو گیری گیل آوا رایا تو چره
تو چره تورا بویی های دکفی می دسوپا
وسته آخه زنی سنگ بشکسه پایا تو چره
من دوارستمه ده هرچی مره بو چپو راست
نام آویرم گیری های می سره رایاتو چره
بوشو آخه ده جمختی مرا تو خانه خراس
تنگه لنگه میانی های گیری تایا تو چره
آنهمه لیسکو ازازیل ایساده ایشپته کا
لاب بنای هامما گیری شل شله کایا تو چره
تو دانستی کی ایسم جنگلی، وحشی، پیله لات
دس باموجه تو نبم را دیهی چایا تو چره
توجمختن نوا جانه تی خاخور تی پئر تی مار
فانکشی شاخا گیری بخته سی یایا تو چره
گیل آوایی نوبو هرماله ایتا دوسته بال
سیه روزان واکفی می پلو پایا تو چره

سركشم سركش هاچين او وحشئ اسپـانا مانم - گیل آوایی

سرکشم سرکش هاچین او وحشی اسپانا مانم-گیل آوایی from GilAvaeiگیل آوایی on Vimeo.

سركشم سركش هاچين او وحشی اسپانا مانم
گيله مردم، گيلكم، سبزم کوچی خانا مانم

داب نی يه می خاكه مِن گردن فوروز آردن بزور
عالما آدم نانم می خاكه گيلانا مانم

فان در آ گردن شكستانا بوبو بيگانا جور
جنگلی جنگل خوسم سرپور به دستانا مانم

ديل بزه دريا ايسم طوفانه امرا دس برار
پور بيدم سرما بچاستا سربه دارانا مانم

خوشكه وايم، گيله وايم، شورمم بی سر صدا
موشته خاكم مئ ريفه قانه فادا جانا مانم

گيلكانا وام رازه گردن ناهان بيگانا زور
زور ببه عالم فوگوردانم می جانانا مانم

وان سوخه نرمی مرا گر مهربان ياری نبه
ياوری حرفه ناويره سنگه خارانا مانم

هركی گيلانه پناه بارده بوبوستم سرپناه
هر هوجوم باردا فوتوركستم می یارانا مانم

سبزمه سبزم مثاله جنگلانه ديلمان
گيله مردم من جه نرمی مئ بيجارانا مانم

چو نزن بيخود گيل آوايه واكفته روزيگار
وانسوخه نرمی مرا مئ گيلو سنگانا مانم

چوم برایی

دانم نایی هاچین تی چوم برایم
تی راشه پایمه چارچرخ هوایم
هاچین گیفتان درم تی سره کُورا
کی شاید بیشتاوی تی رایا پایم

اوروشواره

اوروشواره اوروشواره اوروشواره
امی ایرانه چوم ارسوجا خون واره
بدیم یاور کی میدان شونه وخته، وای!
ناویره حاکمه آدمکوشی، رهبر چوماقداره

ایتا گیلکی سورود

ایتا سورود
گیلان

گیل آوایی
29فوریه 2008

آی گیلان جان گیلان جان
آی گیلان گیلان جان
آی گیلان گیلان
سبزه تاجه ایران
تی چایی باغان
تی جنگل
تی رودخان

تویی جانو جانان
مره سرپناه تو بمان
مره جان پناه تو بمان
آی می سبزه گیلان
آی می چومانه سو، می نفس کوچی خان
تی واستی بمه سربدار
تره بم تره جان فدا

تی دوشمن اسیره
تی بدخوا بیمیره
تی دوشمنده دیل واستی آتش بیگیره

گیلان جان
گیلان جان
گیلان آی گیلان جان
منم
دیل بتی را بنا
منم سر بتی را فادا
منم
گیلکم
تی جنگل ایسه می جیگا
تویی تو
تو گیلان
تو می جاجیگا
تی جنگل جوخوفتن
کرا دوشمنانا فوقوفتن
ایسه ایرثه می کوچی خان
ایسم جنگلی جنگله دیلمان

آی گیلان جان گیلان جان
آی گیلان گیلان جان
آی گیلان گیلان
می جانی
می جانی
می جان
می سبزه گیلان
من تی قوربان
بمان پا بپایه می ایران
کی ایران
تی امرا مانه جاودان

چاردانه

چره تو بئ وفا تيشه بيــــــگيفتی
فو وسته خونه ره شيشه بيگيفتی
بوسوختم ده چره تيجـــــا كودی داز

آ بی تــــــــــابی ميان ترا جیگیفتی

بلا می سر 8

به سی تو می رافا آیمه هانده تی ویرجا بلا می سر
دونیا یا نهم دیمه بمه هانده تی کیشکا بلا می سر
لی شه مانسن دُو وَمه پاک کورو کلاچم
سرسام کی بیگفتم نهمه سر به تی درجا بلا می سر
پور شب دوارست جنگله دیل واهیلا بوسته بوبو اوخان
سرپور اوسانیم هانده شیمی جنگلی نه جا بلا می سر
دیل پر کشه پر تا کی بایم بج بینی یاور امی دیهات
یاور دیهی ره با کولوشو داره تی ویرجا بلا می سر
داره به شلان قوزه کونیم مرزانه سر داد
تا موشته برنج ساق بمانه از کله ورزا بلا می سر!!!
مرزانه کنار صف کشیمی سرده پلا اشپله قل نار
های گیم جه بیجار و کوتامو لاجانه صد جا بلا می سر
تام توم بزن آنقد نوا گفتن گیل آوایی یا آغوزدار
زاری نمانه تا کی بایم هانده تی ویرجا بلا می سر

واشکسه شاخه مرا سرو سها بوستن نشا

عاشقه سرگشته امرا سر برا بوستن نشا
بشکسه دستانه امرا دس کلا بوستن نشا
بشکسه باله مرا پروازه جا گفتن چی سود
جز دمردن قورصه امرا پا بپا بوستن نشا
پور دکفته باغه دیل بولبول خوانه آیه بهار
پوشتا بوسته باغه جا بولبول سرا بوستن نشا
دس بکش بیخود کرا اورشین کونی می حاله زار
من دمردم با می غم ده سر صدا بوستن نشا
کس نامو آ تاسیانی مئن ببه می یارو قار
کوه بباخته جنگلا سبزه قبا بوستن نشا
وا بدن هر کی آیه خوایه بنه تی سر کولا
گابا بوستن دابا بو ده سر برا بوستن نشا
خالی آبه امرا تایه دئن کرا آپچا به کار
لاف دکفته مهمانه سور و صفا بوستن نشا
گیل آوایه وانسوخه بیخود نزن چو جانه یار
واشکسه شاخه مرا سرو سها بوستن نشا

تی بهاره وارشو سرما زمســــــــــــــــتانا بيدم

تی بهاره وارشو سرما زمســــــــــــــــتانا بيدم
تی آلوچه داره تی ته مستی خنـــــــــــــدانا بيدم
چوم ننامه چومه سر بسكی دپركستم جه خواب
خوابو بيداری ميان بس تی فوخوســــــــانا بيدم
تا باموم ايپچه سرادم می ديلا با تـــــــــی خيال
گورشا بوسته قاقابوم بسكی تی گريـــــــانا بيدم
پور بيدم خنده تی لب تی روزيگاره ديلخـوشی
هم تی آهو ناله هم خوشكه بيجـــــــــــارانا بيدم
تا تی پا سر به سايی يـــاور نخواستی سالاسال
داره لچه كشكرت صارا خوروسخوانــــــا بيدم
ديل هاچين واهيلا به وختی كفی بــــی سرصدا
آی خودا من قاقا بوم بسكی تی گريــــــــانا بيدم
نقله تی كفتن ويريشتن پور بوگفت آ روزيـــگار
هرجيگايا فاندرستم تی غزلخوانـــــــــــــــا بيدم
گيل آوايی تورابو بازی بوگود ا روزيـــــــــگار
خو خياله من كرا گه گيله مردانـــــــــــــــا بيدم

بی وفا یارا هاچین گفتان دری واویجه مه

کی بنا رسمه جودایی بی تو تنها هیچه مه
تی خیالا سر گیرم آتش گیرم واویجه مه
پر گیرم باله خیاله امرا شم تی جا جیگا
های ایسم چوم اینتظاری پاک مرا واپیچمه
درده درده درده بی تو بی کسی تنها ایسان
پاک مثاله خوشکه هیمه ول گیرم دیبیجه مه
گر چی من باور نداشتیم دیل کرا بازم ترا
دیل دباختم دیل دباختم بی وفا لاب گیجه مه
کاره دونیایه خوره بشکسته پا همیشه سنگ
من کی سرتا پا وفایم بی وفا جا بیجه مه
آی کی تو آتش بزی می دیلو جانا با تی کار
به بیدین سوجم واسوجم گورشه کا بیبیشته مه
گیل آوایی توبوسوج واسوج بوکون تیسینا چاک
بی وفا یارا هاچین گفتان دری واویجه مه

یلدا

شبه یلدا شبه چــــــــــله به نوبت
بوبوسته شبچره درخاکه غوربت
انارو هیندوان فاله حـــــــــــــافظ

بازام واستی بخوانیم وای غوربت!

دوتا چاردانه

دانی کی تو ادونیــــــــا می نفس بی

فوقوفته ناکســـــانه مئن، تو کس بی

سیا به روزیــــگار هامما فوتورکست

بنا دوری ناویره دس فــــــارَس بی

***

می شعره مئن دینی می اشکه جـــــایه

بوجوز می شعر ده می امرا کی پـــایه

بوبوسته ایجگره می دادو فریـــــــــاد

جه می چوم دیمه سر پاک خون برایه

ایتا چاردانه

بوشوم دریــــا ببه ایپچه می دیل واز

بخواندم دیلـــــــــــــــــمانی مره آواز

جه دریا ارسو، تاچکره بوبوم هیست

می چوم دریــــا بوبو، دریا بوکود ناز

.

- ارسو = اشک

چکره = زانو

گیلیکی چاردانیان فارسی واگردانه مرا

گیلیکی چاردانه
فارسی واگردانه مرا
چهاردانه گیلکی
با براگردان فارسی

از:گیل آوایی

1

دوچوکسته تی بیخوابی می چومه
تی یادا کش بزم موردابه کومه

بازین تا صبح نامو می چومانا خواب
هاچین تی خوابه دئنه چوم فوچه مه

برگردان فارسی:
چسبیده بیخوابیت به چشمهایم
کومه مرداب و یاد ترا بغل کردم
سپس تا صبح نیابد خواب به چشمهام
برای خواب دیدنت بیهوده چشمانم را روی هم گذاشتم


2

خیالا گم دیلا با تو ولانه
بشه دریا کرا تنها بمانه

نگه بی تو همش آی دادو بیداد
ده تی قورصه بوبو می آبو دانه

برگردان فارسی:
به خیال می گویم دلم را با تو نگذارد
که به دریا رفته و تنها بماند
نگوید بی تو دائم داد و بیداد
دگر قصه ات مرا شد آب و دانه


3

بوبوم دورسفته لافند کی درم لات
جه خاطر لاب ببرده می دیله صاب
نایه هرماله می یاره پیله لات
جه تنهایی بوبو همدم مره گاب

برگردان فارسی:
پوسیده طناب فراموش شده در قرق شده ام
صاحب دل من مرا از یاد برده است
یار بزرگ لاتم، بندرت سراغم می آید
ز تنهایی گاو شده همدم من
4

کرا ده تاسیانی یام بوبو داب
نیبه هرماله کس غوربت تی همخواب

شبان الله تی تی تابه تی راشی
تره گی، ایشتاوی واشا زنه شی*
*( شی، شِه = شب نم )

برگردان فارسی:
دیگه دلتنگی و بی قراری هم مد شده
بندرت کسی در غربت همخواب تو بشه
راه ترو مهتاب می تابه
با خودت میگی، میشنوفی، روعلف شب نم میشینه

5
می دیل بی تابه بی تابه می ماره
خیاله هانده دیل پیسقاله زاکه

هاتو کی ایشتاوه می ماره نامه
مثاله کیشکا زای نه سر بناله


برگردان فارسی:
دلم بی تاب بی تاب مادرمه
انگار که دلم نوزادی شده
همینطور که نام مادرم را میشنوفه
مثل جوجوه ای کوچک سر مبذاره به ناله


6
مرا گِه تو چقد بی آه و ناله
فیشان قورصا زمانه بیخیاله
چوتو دیمه بنم من انهمه داغ!؟
جه می ناله واسی کاخان بکاله *
*( بکاله = فروریزد)

برگردان فارسی:
به من می گوید چقدر آه و ناله ای
دور بریز قصه را که زمان بیخیالیست
چطور این همه داغ را کنار بگذارم!؟
از ناله ام باید کاخها فرو بریزد



7

بهار، تی چوم؛ قشنگی آفتابه
سیا دوم، زرده دوم، تی ماهتابه

تویی تو وا واتابی دیل ببه شاد
ناویره قورصه جا دیل وا تورا به

برگردان فارسی:
چشم تو بهار، قشنگیت افتاب است
دوم سیاه و دم زرد* ماهتاب تست
تو هستی تو که باید بتابی تا دل شاد شود
وگرنه از غصه دل باید دیوانه شود
*دمسیاه و دم زرد، دونوع برنج بسیار مرغوب است


8

بیگیفتم حافیظه فالا تی واستی
بوگفته واهیلا بوستی چی واستی

نیبه هرماله خوشکیل تی وفا دار
تویی تو یاره ره بی لاب آغوزدار

برگردان فارسی
برایت فال حافظ گرفتم
گفت برای چه سرگشته شدی
زیبا رو وفادار تو نمی شود
تو هستی که برایش بحساب نمی آیی



9


می دیل هانده اسیره تی نیگایه
کرا های ونگ زنه گه تی فدایه

تی قورصه آخرش دیلا بوگود گورش
بوبوسته زندگانه پاک مره تورش
برگردان فارسی
دلم باز هم اسیر نگاه تست
همیشه گریه می کند، می گوید فدای تست
غصه تو دلم را داغ کرده است( سوزانده است)
زندگی دیگر برایم ترش شده

10

دانی می روریگار از تو سیایه
تورا بوسته خرابه می جیگایه
مرا زاکان نیهید دایم سره کار
مرا گید عاشیقه بی دستو پایه

برگردان فارسی
می دانی روزگارم از تو سیاه است
دیوانه شده ام ویرانه جای من است
بچه ها مرا دست می اندازند
به من می گویند عاشق است بی دست و پا است


11
دانی دونیا ایتا خربستگایه
بناده گابکی آ خشته بنایه
نوبو ماسکا هاچین چمچینو پرچین
کی تا واخوب بیبی چارچرخ هوایه

می دانی که دنیا خر تو خره
مثل گاو خشت این بنا را روی هم گذاشته اند
بیخود منم منم ها نکن
که تا بخودت آیی چهارچرخت هواست*
*کنایه از مردن یا ناکارآمدی