۱۳۹۹ تیر ۱۷, سه‌شنبه

کاله گب( کله گب)/ گیلداستان - گیل آوایی

کاله گب/گیلداستان - گیل آوایی
    سه شنبه ۱۷ تير ۱۳۹۹ - ۷ ژوييه ۲۰۲۰

  1
روبرت:
-         ماریا!
ماریا:
-         ها!
-         من اکه بیمیرم تو چی کونی؟
-         من!؟
-         اها

ماریا هاتو کی اونا فاندریستان دوبو فکراشوبو بازین بوگفته:
-         هو عکسا کی همدیگه مرا داریمی پیللا کونمه زنم دیفارا!
-         کو عکسا؟
-         هوو عکسا که بوشوبیم بودن زی[1]!
-         بودن زی
-         آها. هون کی سه تا کشور....
-         ا.... آها...
-         اولی سفر بو
-         اها
-         خاب چی ببه کی پیلا کونی بزنی دیفار!؟

ایتا خنده بوکود. ایجور عشقو مهربانی اونه فاندرستنه مِئن موج بزه. گه:
-         خایم هر شب وختی تی یاده جا شراب خورم بتهون گوش دمه تی عکسا فان درم تی مرا ببم!
-         دیوانه!

تام زنه ده. ایتا پیچه بوبوسته پسی ماریا واورسه:
-         من اگه بیمیرم تو چی کونی؟
-         من!؟
-         آها!
-         تی یاده مرا شمه ایتا دیگه عشق یافمه!
-         خیلی خری!

2

روبرت:
-         ماریا!
ماریا:
-         ها!
-         اگه بیمیرم چی کار کونی؟
-         ایتا نفس راحت کشمه!
-         چی!؟
-         ایتا نفس راحت کشمه گمه اوخی بوشو راحتا بوستم!

هر دو نفر قاه قاه خنده کونه ده. خنده میان ماریا واورسه:
-         من اگه بیمیرم تو چی کار کونی؟
-         هر شب ایتا مِمانه تایه دینم!
-         مِمانی!؟
-         ها!؟ آها!
-         بازین چی!؟
-         مستا کونم!
-         بازین چی؟
-         تا می دیل خایه مسته مست عشقبازی کونمه!
-         خاب هاسا چره نوکونی!؟
-         آخه!
-         آخه چی!؟
-         آخه تو......
-         من چی!؟
-         آخه تی مرا ده هاچین خاخور براریم!
-         دیوانه!
-         چره دیوانه!؟
-         دیوانه یام نه!
-         پس چی!؟
-         خیلی خری!

3

روبرت:
-         ماریا!؟
ماریا:
-         ها!؟
-         اگه بیمیرم تو چیکار کونی؟
-         آزا گیرمه!
-         بازین چی؟
-         ونگ زنمه
-         بازین چی؟
-         سی یا دوکونمه!
-         بازین چی؟
-         آزا تومانا به!
-         بازین چی؟
-         ارسویانام تومانا به!
-         بازین چی؟
-         بازین ناره ده!
-         یانی چی بازین ناره!؟
-         یانی ان کی تو کی نه سایی بازینام  ننا!
-         خولاصه ایتا کار واستی بوکونی! نه!؟
-         نانم. شایدام ایتا بیافم ببه کی اونه مرا راحت ببم!
-         می مانستن!
-         نانم. شاید!
-         تانی!؟
-         آدم همیشک تانه! تو نتانی!؟
-         من!؟
-         آها تو!
-         خاب تنایی کی...
-         تنایی چی!؟
-         شایدام ژاکلین مرا تنا ننه!
-         اون کی همیشک هایا ایسا!؟
-         خاب هانه ده!
-         یانی ژاکلینه مرایام بله!؟
-         اها! چره نه!؟
-         پس کی!؟
-         ایتایا بیاف!
-         بوشو تونام تی دیل خوشه یا!
-         تی دیل خوشه ناره کی. ایتایا بیاف خاب!
-         ژاکلین ایسا کی!
-         بازام بوگفته ژاکلین!
-         آها خاب. اونه مرا راحتم!
-         اه....!
-         اها!
-         ژاکلینه مرا یکشنبه یان آیی می خاکه سر؟
-         من اکه بوگفتمه کی آیم تی خاکه سر!؟
-         خیلی خری!

4

روبرت:
-         ماریا!
ماریا:
-         ها!؟
-         اگه بیمیرم چی کار کونی؟
-         هی چی!
-         یانی چی هی چی!؟
-         خاب او وخت منام بمردمه!
-         یانی چی!؟
-         یانی ان کی تو بیمیری منام بمردمه ده!
-         اگه نمردی چی؟
-         خاب یانی انه کی..!
-         یانی چی؟
-         یانی ان کی ده زندگی بی تو زندگی نی یه! مردنه! مردگیه! فامی!؟
-         راستراستی بوگو رومئو ژولیت بازی در ناور!
-         رومئو ژولیت ناره! زندگی تی مرا زندگیه وختی نیبی ده زندگی هی وخت هون نیه کی تی مرا بو!

تام زنه ده. تسکه تام زئنه مئنی کی اونه مئن هیزارتا فکر و خیال موج زه یی. همدیگه یا قاقا بو فاندریدی. بازین ایدفایی ماریا گه:
-         راستا بگم تا هاسا اونه فکرا نوکودم!

تام زنه ده. بمانسته شرابا پیاله مئن هوتو کی فکراشوبید سراشده. ماریا واورسه:
- اگه من بیمیرم چی کار کونی؟
-         نانم!
-         یانی چی نانی؟
-         خاب تا هاسا همیشک زنده بی وختی نیبی اوو وخت نانم چوتو به من چوتویمه!
-         خاب چوتو ناره. ایتا وخت  بیده یی بمردمه، نِه سامه، چی کار کونی؟
-         دانی چیسه!؟
-         چی؟
-         آدم وختی ایتا تازه  شرایطه مئن ایسه، هو شرایطه آدم به. آما آدمان خیلی کولکه باورده ییم. ها راحتی یانام نی یه. تازه شرایط، تازه واقعیت، تازه نیازان، چی دانم هیزارتا تازه زهره مار! کی آدم هو شرایط وختی قرار بیگیره ایتا تصمیم گیره کاری بوکونه. نانم بوخودا چی کونمه. ایتا خاک می سر فوکونم ده!

ماریا ایتا پیچه فکرا شه. ایدفایی گه:
-         پس خودم واستی نمرده نه تره ایتا فکر بوکونم تو اورزه ناری. نخایم وختی بمردمه تی دسوپایا آویرا کونی ایتا بلا تی سر بایه!
-         دیوانه یی. نخایی بمرده پسی یام مرا سرا دی!
-         مرا بیدین!
-         آخه وختی نه سایی ده چی توفیر داره کی من چی کونم چی نوکونم تو کی بمرده یی!
-         خاب مالومه کی مره توفیر داره!
-         باور بوکون فرق نوکونه. انا کی اسا گفتان دری انه واستی یه کی زنده یی. آدم تا زنده یه همیشک ایچی داره که جه اون جلاسته نا. ایچی کی اونه مرا حس کونه زنده یه تونام هاتو وختی بمردی همه چی تی ره بمرده یه. فامی! اشانا آما زنده یان واکفیمی. زنده یانه ره مانی دیهه وختی آدم بمرده بمرده. تونام بیمیری ده بمرده یی. تی همه چی تی مرا تومانا بوسته یه. ده نه سایی کی.... بابا بمردی بمردی ده! آ زنده یانه شینه مرا کار ناری!
-         خیلی خری!

5

هیکس نه سا. ایتا صدا نایه. هیکسه حرف زئن ننا. ایتا چراغه سو ننا یو ایتا روشنی یام. درجی واز نی یه. ایتا پرده کناربوشو نی یه. نه ایتا چراغ نه ایتا درجی. هیکس نه سا ایچی بگه. ایتا دمرده خانه یه تسکوتاسیانی مئن. تا کو وخت، کی، بازام بگه:
-         می بمرده پسی چی کونی!؟




[1] Boedensee=lake Constantine  ایتا دریاچه اوروپامئن کی اتریسو آلمانو سوئیس اونه دور ناها

هیچ نظری موجود نیست:

ارسال یک نظر